Nagpahimangno si PMAJ Dan Junson Espinosa, Provincial Chief sa CIDG Misamis Oriental, sa mga negosyante ug konsumidor nga dili magkompyansa sa pagpalit ug pagbaligya sa peke nga Magic Sarap tungod sa posibleng peligro niini sa kahimsog sa tao.
Matud ni Espinosa, usa sa mga timailhan nga posibleng peke ang maong produkto mao ang sobra nga kabarato sa presyo niini. Iyang gipasabot nga mailhan usab ang kalainan sa orihinal ug peke pinaagi sa baho. Ang orihinal nga Magic Sarap adunay humot nga baho nga sama sa pagkaon, samtang ang peke adunay baho nga sama sa kemikal ug makapaluod, nga daw makapasuka sa makapanimaho niini.
Tungod niini, giawhag ni Espinosa ang mga negosyante ug konsumidor nga mag-amping sa pagpalit sa mga produkto ug mopalit lamang gikan sa mga lehitimong supermarket ug kasaligan nga mga supplier. Iyang gipahinumdoman ang publiko nga ang paggamit o pagkonsumo sa mga peke nga produkto mahimong makahatag og peligro sa kahimsog.
Dugang pa niya, dili lamang sa Magic Sarap angay nga magbantay ang publiko, kay posible usab nga adunay ubang mga produkto nga peke nga anaa sa merkado. Busa, importante nga susihon pag-ayo ang mga produkto sa dili pa paliton.
Ang pahimangno ni Espinosa nahitabo human sa pagkadakop sa usa ka Chinese nationals nga giingong nalambigit sa pagbaligya sa peke nga Magic Sarap sa may Bulua, Cagayan de Oro City.
Photo courtesy: Cidg MisOr (Misamis Oriental Pfu)
