Nakabaton sang pinansyal nga bulig kag nagkalain-lain nga kinahanglanon sa eskwelahan ang mga estudyante halin sa pamilya ni Nanay Dopet Manguda sa Barangay Kuden, Senator Ninoy Aquino, Sultan Kudarat.
Pinaagi sa Provincial Social Welfare and Development Office ukon PSWDO, gindul-ong ang bulig sa Megpanga DepEd Extension sang Kuden Elementary School, kasunod sang naglapta sa social media nga post parte sa mga kabataan nga nagagamit sang daan kag kinakalawang nga lata sang gatas bilang suludlan sang ila balon.
Lakip sa ayuda ang pinansyal nga suporta pinaagi sa Assistance to Individuals in Crisis Situation ukon AICS, grocery items, mga sako sang bugas, bag-o nga backpacks nga may sulod nga school supplies, kag mga bag-o nga balunan.
Nagpasalamat man ang PSWDO kay Governor Datu Pax Ali S. Mangudadatu sa padayon nga suporta sa paghatag sang serbisyong sosyal, lakip ang kooperasyon sang Municipal Social Welfare and Development Office sang Senator Ninoy Aquino.
Photo courtesy: Gov. Datu Pax Ali S. Mangudadatu
