Tulo ka indibidwal ang gidakop sa hiniusang operasyon sa kapulisan ug National Bureau of Investigation (NBI) sa Purok Sto. Niño, Barangay Bungtod, Tandag City, Surigao del Sur niadtong nakalabayng adlaw.
Gipahigayon ang operasyon pinaagi sa pagpatuman sa search warrant may kalabotan sa giingong paglapas sa Republic Act No. 9165 o Comprehensive Dangerous Drugs Act of 2002.
Sumala sa Tandag Component City Police Station (TCCPS), ang mga nadakpan giila lamang sa alyas nga “Cafgu,” 38 anyos; “Loloy,” 32 anyos; ug “Soysoy,” 37 anyos.
Atol sa operasyon, nakumpiskar ang tulo ka sachet nga gidudahang shabu, nga adunay kinatibuk-ang gibug-aton nga tulo ka gramo ug gibanabanang kantidad nga ₱20,400.
Narekober usab sa mga operatiba ang usa ka kalibre .45 nga pistola, mga magasin, buhing bala, ug uban pang mga butang nga giingong may kalabotan sa ilegal nga droga.
Ang operasyon gipahigayon sa City Drug Enforcement Unit sa TCCPS, kauban ang Surigao del Sur Provincial Drug Enforcement Unit ug NBI-Caraga, ubos sa pagpangulo ni Police Lieutenant Colonel Junyd D. Marohom, Acting Chief of Police.
Gidala ang mga nadakpan ngadto sa estasyon sa kapulisan alang sa dugang nga imbestigasyon ug dokumentasyon. Nag-andam na usab ang kapulisan sa tukmang mga reklamo ubos sa RA 9165 ug RA 10591 o Comprehensive Firearms and Ammunition Regulation Act, subay sa resulta sa imbestigasyon ug legal nga mga kinahanglanon.
Photo courtesy: PNP Tandag City
