Giklaro sa Land Transportation Franchising and Regulatory Board (LTFRB) 9 nga provisional o temporaryo pa lamang ang fare increase nga gipatuman sa Public Utility Bus o PUB ug modern jeepney sa tibuok Zamboanga Peninsula.
Matud ni LTFRB-9 Regional Director Tommy “Tanjie” Macadindang, gisugdan niadtong Septiyembre 28 ang provisional fare increase isip tubag sa kalit nga pagsaka sa presyo sa petrolyo nga nakaapekto sa gasto sa operasyon sa mga pampublikong sakyanan.
Dugang pa ni Macadindang, dili permanente ang maong dugang pasahe tungod kay posible kining usbon depende sa lihok sa presyo sa petrolyo. Kon moubos ang presyo sa gasolina, posible usab nga mokunhod ang pasahe, subay sa padayong pagmonitor sa ahensiya.
Gipasabot nga pinaagi niini, gikonsiderar sa LTFRB 9 ang panginahanglan sa mga operator nga makasustenir sa ilang operasyon, ingon man ang epekto sa dugang pamasahe sa mga pasahero.
