Sikop sa mga awtoridad ang usa ka 33-anyos nga lalaki nga giilang usa ka “Street-Level Individual” human makuhaan og gibanabanang ₱35,224.00 nga balor sa gidudahang shabu atol sa usa ka buy-bust operation sa Barangay San Agustin Sur, Tandag City, Surigao del Sur niadtong nakalabay nga adlaw.
Gipahigayon ang maong malampusong operasyon sa hiniusang pwersa sa Tandag Component City Police Station–City Drug Enforcement Unit (TCCPS-CDEU) isip nanguna nga yunit, uban ang National Bureau of Investigation (NBI). Nahitabo ang pagpangronda sa Purok Kalipayan, Donasco Village sa maong barangay.
Giila ang dinakpan pinaagi sa alyas nga “Jamel”, kinsa nalista isip usa ka bag-ong giila nga drug personality sa dapit. Ang operasyon gipangulohan ni PCPT Januario U. Pontillo, Deputy Chief of Police, ubos sa superbisyon ni PLTCOL Junyd D. Marohom, ang Acting Chief of Police.
Nakuha gikan sa posisyon sa suspek ang tulo ka heat-sealed plastic sachet nga adunay sulod nga puting kristal nga substansya nga gidudahang shabu, nga may kinatibuk-ang gibug-aton nga 5.18 gramos. Lakip sa mga narekober ang usa ka kaha sa sigarilyo, usa ka tinuod nga ₱1,000 bill nga gigamit isip buy-bust money, ug upat ka photocopy sa tag-₱1,000 nga salapi.
Sa pagkakaron, ang dinakpan anaa na sa kostudiya sa kapulisan, alang sa tukman disposasyon.
Photo courtesy: PNP Tandag City Police Station
