Gipalig-on sa Lokal nga Panggamhanan sa Kapalong ang koordinasyon ug pagtinabangay sa nagkalain-laing ahensya pinaagi sa Multi-Agency Response Protocols Orientation nga gipahigayon niadtong nakalabay nga adlaw, sa MPDO Conference Hall, LGU Compound, Maniki, Kapalong, Davao del Norte.
Gitambongan ang kalihokan sa mga opisyal sa lokal nga panggamhanan ug mga personahe sa Municipal Disaster Risk Reduction and Management Office (MDRRMO), diin gihisgutan ang mga pamaagi sa pagtubag sa kalamidad, mga tahas ug responsibilidad sa matag ahensya, ug mga sumbanan sa operasyon ubos sa Incident Command System (ICS).
Lakip usab sa mga hilisgutan ang legal nga basihan ug mandato sa Response Cluster, mga lagda sa Disaster Risk Reduction and Management (DRRM), sayong pahimangno ug pagpaandar sa Emergency Operations Center (EOC), lakip ang mga pamaagi sa pagtubag sa kalamidad panahon sa mga kalihokan ug emerhensiya.
Pinaagi sa maong pagbansay, gitinguha nga mapalambo ang komunikasyon, panaghiusa ug episyenteng pagresponde sa mga ahensya aron masiguro ang kaluwasan ug kaandam sa katawhang Kapalongnian panahon sa kalamidad ug uban pang emerhensiya.
Photo Courtesy: Kapalong InfoCenter
