Nakadawat og upat ka pasidungog ang Lokal nga Kagamhanan sa Socorro, Surigao del Norte, atol sa Caraga Regional Excellence Awards 2026 nga gipahigayon sa Department of the Interior and Local Government o DILG isip pag-ila sa mga lokal nga kagamhanan nga nagpakita og maayong pagdumala ug epektibong serbisyo publiko.
Gitambongan sa nagkadaiyang dakbayan ug lungsod sakop sa Caraga Region. Sumala sa lokal nga administrasyon, nagpakita ang maong kalampusan sa paningkamot sa munisipyo sa pagpatuman sa mga programa, pagpauswag sa serbisyo ug pagtubag sa mga panginahanglan sa katawhan.
Gipasiugda usab ang panaghiusa sa mga opisyal, pangulo sa nagkalainlaing departamento, kawani ug mga kaabag sa komunidad sa pagpadayon sa kalamboan sa Socorro. Gilauman nga magsilbing inspirasyon ang mga pasidungog aron dugang nga mapalig-on ang pagkamay-tulubagon, maayong pagdumala ug serbisyong nag-una sa kaayohan sa publiko.
Padayon nga tumong sa munisipyo ang pagpaabot sa mga serbisyo ngadto sa mas daghang residente ug pagpalambo sa usa ka inklusibo ug mauswagon nga komunidad alang sa tanang Mabungahong Socorronhon.
