Patay ang usa ka babaye, samtang kritikal ang kahimtang sa iyang live-in partner human silang gitigbas sa ilang silingan gamit ang lagaraw sa Purok 16, Barangay Maguinda, Butuan City, pasado ala 1:00 sa hapon niadtong nakalabay nga adlaw.
Ang namatay nga biktima giila nga si Rocel Morano, residente sa Barangay Banza, Butuan City, samtang ang iyang live-in partner nga si Marjun Villena, residente sa Purok 16, Barangay Maguinda, nakaangkon usab og samad nga maoy hinungdan sa iyang kritikal nga kahimtang.
Ang suspek giila nga si Rodrigo Camora, 54 anyos, residente sa maong lugar. Base sa inisyal nga report sa kapulisan, personal nga panaglalis ang giingong hinungdan sa insidente. Dali usab nga nadakpan sa mga otoridad ang suspek human sa maong krimen.
Samtang, ang patayng lawas sa biktima gitugyan na sa iyang pamilya, ug padayon pa ang imbestigasyon sa kapulisan aron matino ang tibuok sirkumstansiya sa nahitabong ngilngig nga pagpanigbas.
Photo courtesy: Danny Luyahan
