Upat ka lalaki ang nadakpan sa kapulisan samtang nasakmit ang P2.3 milyon nga kantidad sa nga smuggle nga sigarilyo sa gipahigayong operasyon sa Barangay White Beach, Pagadian City, mga alas 11:15 sa buntag, Oktubre 14. Ang mga dinakpan nag-edad og 20, 26, 30 ug 32 anyos, ug pulos mga residente sa Barangay Datu Sinsuat, Maguindanao del Norte.
Ang operasyon gikasa sa mga personahe sa Zamboanga del Sur Maritime Police Station kauban ang ubang yunit sa kapulisan ug law enforcement agencies.
Narecover sa operasyon ang 40 ka master case sa White Cannon Menthol cigarettes nga gibana-bana og nagkantidad og 2.3 milyong pesos, lakip ang duha ka kahoy nga de-motor nga sakayan nga walay marka.
Gidala ang mga dinakpan ug ang mga nakumpiskang ebidensiya ngadto sa Zamboanga del Sur Maritime Police Station alang sa hustong disposisyon.
Samtang atubangon sa mga suspetsado ang kasong paglapas may kalabutan sa Republic Act 10643 o ang Graphic Health Warnings on Tobacco Products Act.
Photo courtesy: ZSPPO
