Giawhag sa City Agriculture Department (CAD) ang mga Ormocanon nga mangandam sa posibleng epekto sa Super El Niño pinaagi sa husto nga paggamit sa tubig ug pagpananom og mga utanon sa tagsa-tagsa ka panimalay.
Sumala kang CAD Officer-in-Charge Dante Albarico, gipahigayon sa departamento ang pagpasiugda sa Project JOSEPH nga nagtumong sa pagsuporta sa sektor sa agrikultura pinaagi sa paghatag og mga planting materials ug pagdasig sa mga pamilya sa pagpatuman sa backyard gardening.
Pinaagi niini, gilaoman nga makatabang ang programa sa pagpalig-on sa seguridad sa pagkaon sa mga panimalay, ilabina kon maapektuhan ang produksyon sa agrikultura tungod sa posibleng dugay nga hulaw.
Gawas sa pagpananom, giawhag usab ni Albarico ang publiko nga magkonserbar sa tubig ug likayan ang pag-usik niini isip pagpangandam sa posibleng epekto sa Super El Niño.
Gipasiugda sa CAD ang kamahinungdanon sa sayong pagpangandam aron mamenosan ang posibleng epekto sa hulaw sa agrikultura ug sa suplay sa pagkaon sa dakbayan.
Photo courtesy:City Government of Ormoc
