Nadakpan sa mga kapulisan ang usa ka 47-anyos nga lalaki nga giilang si alyas “Tope,” minyo, usa ka insurance agent ug residente sa Barangay Ipil ning dakbayan human giingong nangulata atol sa panaglalis didto sa San Vidal Street, Barangay West, Ormoc City, pasado alas-11:50 sa buntag niadtong nakalabay nga adlaw.
Base sa inisyal nga imbestigasyon sa Ormoc City Police Station 1 (OCPS1), nasayran nga nalambigit ang suspetsado ug ang reklamante sa mainit nga panaglalis. Atol niini, giingong gisagpa sa suspetsado ang reklamante gamit ang usa ka palid nga papel ug gisumbag sa wala nga bahin sa nawong.
Tungod sa insidente, nakaangkon ang reklamante og gamayng samad sa tuo nga kumagko. Human sa insidente, gipugngan sa manager sa kompanya sa insurance ang suspetsado ug gitugyan ngadto sa mga nirespondeng kapulisan.
Gipahibalo usab ang suspetsado sa hinungdan sa iyang pagdakop ug sa iyang mga katungod ubos sa Miranda Doctrine, gamit ang pinulongang iyang nasabtan.
Gidala ang dinakpan sa OCPS1 alang sa dokumentasyon ug hustong disposisyon sa kaso.
Photo Courtesy: OCPS 1
