Naghari ang kalipay ug panaghiusa sa mga magtutudlo atol sa Teachers’ Night nga gipahigayon sa lokal nga panggamhanan sa Montevista, Davao de Oro, sa Municipal Gymnasium ning Biyernes, Oktubre 16, 2026.
Misidlak sa kalipay ang mga panagway sa mga magtutudlo nga mitambong sa maong kalihukan, diin ilang napahimuslan ang higayon nga makig-uban, maglipay-lipay ug makadawat og pag-ila alang sa ilang kahago ug dedikasyon sa natad sa edukasyon.
Mitambong usab sa maong kalihukan si Davao de Oro Vice Governor Dorothy Gonzaga, Montevista Mayor Cyrex L. Basalo, kauban ang ubang lokal nga opisyal, mga department head ug mga magtutudlo gikan sa nagkadaiyang lebel sa mga eskwelahan.
Pinaagi sa maong panagtigom, gipasiugda ang dakong papel sa mga magtutudlo sa paghulma sa kahibalo, maayong pamatasan ug kaugmaon sa mga estudyante.
Labaw pa sa usa ka selebrasyon, nahimong higayon ang Teachers’ Night aron ipabati sa mga magtutudlo nga giila ug gipabilhan ang ilang walay kakapoy nga pag-alagad isip mga haligi sa edukasyon ug mga maggiya sa sunod nga henerasyon.
