Nadakpan sa kapulisan ang usa ka 36-anyos nga lalaki nga giilang si alyas “Botyok,” ulitawo, walay trabaho ug residente sa Barangay Naungan, Ormoc City human giingong nasakpan nga nagtangtang sa baterya sa usa ka sakyanan didto sa Barangay Doña Feliza Mejia, Ormoc City, pasado alas-8:50 sa gabii niadtong nakalabay nga adlaw.
Sumala sa report, nasakpan umano sa 46-anyos nga complainant ang suspek nga nagtangtang sa baterya sa ilang sakyanan nga walay pagtugot. Matud sa kapulisan, mitawag dayon og tabang ang complainant ug mitaho sa insidente, hinungdan nga misanong ang mga intelligence operatives sa Ormoc City Police Station 1 (OCPS1) sa maong lugar.
Atol sa operasyon, nadakpan ang suspek ug narekober gikan kaniya ang natangtang nga baterya nga gibanabana og kantidad nga P7,000, lakip ang nagkalain-laing kagamitan nga gituohang gigamit sa pagtangtang sa baterya.
Samtang, gidala ang suspek uban sa mga narekober nga kagamitan ug ebidensiya ngadto sa OCPS1 alang sa dokumentasyon ug hustong disposisyon.
Gipangandam na usab sa kapulisan ang mga dokumento alang sa pagsang-at sa kasong theft batok sa suspek, nga ipailalom sa tukmang proseso sa imbestigasyon ug tukmang legal nga proseso.
Photo courtesy: PNP OCPS1
