Kapin 29 gramos sa gidudahang shabu ang nasakmit ug lima ka mga suspetsadong nalambigit sa illegal nga droga ang nadakpan sa sunod-sunod nga anti-drug operations nga gipahigayon sa nagkalain-laing lugar sa Eastern Visayas niadtong Lunes, Setyembre 28. Lakip sa mga nadakpan ang usa ka giila nga high-value individual (HVI) ug usa ka street-level individual (SLI).
Ang pinakadakong kantidad sa nasakmit nga gidudahang shabu nakuha sa operasyon nga gilusad sa Tacloban City Police Office-Police Station 3 Station Drug Enforcement Unit (TCPO-PS3 SDEU), diin nadakpan si alyas “Chan,” 34 anyos, usa ka pintor ug giila nga HVI nga residente sa Tacloban City.
Sa kinatibuk-an, mikabat sa gibana-banang 29.735 gramos ang gidaghanon sa gidudahang shabu nga nasakmit, nga adunay hiniusang Dangerous Drugs Board (DDB) value nga gibana-banang ₱202,198.
Matud pa ni PRO-8 Regional Director PBGen Romano Cardiño, nagpakita ang maong mga operasyon sa padayong paningkamot sa kapulisan sa rehiyon aron pugngan ang illegal nga drug trade ug mapanalipdan ang mga komunidad sa tibuok Eastern Visayas. Ang mga nadakpan ug nakumpiskar nga mga butang ipailalom sa hustong proseso sumala sa balaod.
Photo courtesy: Tacloban City Police Office- Police station 3 Station Drug Enforcement Unit
