Nadakpan sa mga otoridad ang usa ka kanhi team leader sa Philippine National Police-Criminal Investigation and Detection Group (PNP-CIDG) nga giilang si alyas “Boss Thad,” hingkod ang pangidaron ug residente sa Barangay Binogtoan, Maripipi, Biliran nga giingong dugay nang gipangita tungod sa kaso sa malversation of public funds or property didto sa Abucay Bus Terminal, Tacloban City niadtong Septiyembre 29, 2026.
Sumala pa sa mga otoridad, ang pagdakop gihimo nga warrant of arrest nga mando sa Regional Trial Court Branch 6 sa Eighth Judicial Region, Tacloban City. Ang maong mando may kalabotan sa Criminal Case No. 2010-02-103, ug gitakda ang piyansa nga P40,000 alang sa iyang temporaryong kagawasan.
Base sa impormasyon, gitangtang na sa serbisyo ang maong kanhi pulis niadtong 2007 ug ang kaso batok kaniya may kalabotan sa giingong sayop nga pagdumala sa pondo o kabtangan sa gobyerno, apan ang iyang tulubagon niini mag-agad sa hustong proseso sa korte.
Sa pagkakaron, anaa na sa kustodiya sa kapulisan ang naasoy nga suspetsado alang sa tukmang dokumentasyon ug disposasyon.
Photo Courtesy: NewsDesk
