Angol ang usa ka lalaki nga giila sa alyas “Gelo,” 24 anyos, usa ka mag-uuma, adunay live-in partner ug residente sa Barangay San Miguel, Leyte human aksidenteng mabanggaan sa usa ka dump truck nga gimaneho ni alyas “Gino,” 44 anyos, residente sa Sitio Busay, Barangay Guinciaman, San Miguel, Leyte didto sa municipal road sa Sitio Kasagingan, Barangay Bairan, San Miguel, Leyte, pasado alas 5:50 ang takna sa hapon niadtong Setyembre 29, 2026.
Base sa inisyal nga imbestigasyon sa mga otoridad, ang biktima giingong nakainom og makahubog nga ilimnon sa wala pa ang insidente. Kalit siyang midagan ug mitabok sa kalsada hinongdan nga nabanggan siya sa maong dump truck.
Tungod sa maong insidente, nasamdan ang biktima ug gidala sa Eastern Visayas Medical Center (EVMC) alang sa pagtambal. Samtang, luwas ra hinoon ang drayber sa dump truck ug gidala siya uban ang maong sakyanan ngadto sa San Miguel Municipal Police Station (MPS) alang sa hustong disposisyon.
