Gikumpirma ni Barangay Captain Fernando “Loloy” Pasa sa Barangay Sta. Maria, Pagadian City, nga lakip ang Zamboanga del Sur National High School sa mga eskwelahan nga nakadawat og gikatahong hulga nga mikatag sa social media sa miaging adlaw.
Sa pakighinabi sa Juander Radyo News Team, giingon ni Kapitan Pasa nga gilayon siyang nagpadala og mga barangay tanod aron motabang sa traffic management ug seguridad sa palibot sa eskwelahan.
Gibanabana ni Kapitan nga mokabat sa 7,000 hangtod 8,000 ka population sa estudyante ang naa sa maong eskwelahan, hinungdan nga gipakusgan ang pagbantay kauban ang mga personahe sa Pagadian City Police Station.
Sigun sa kapitan nga tulo na ka adlaw nga mikatag ang maong pagpanghulga, ayha paman natumbok sa mga imbestigador ang source sa mensahe nga usa ka grade 8 nga estudyante nga migamit sa account sa facebook.
Padayon nga giplastar ni Kapitan Pasa ang mga tanod alang sa pagmonitor sa sitwasyon aron masiguro ang kaluwasan sa mga estudyante, magtutudlo ug school personnel.
