Gilauman ang 25 ka Micro, Small, ug Medium Enterprises (MSMEs) gikan sa Zamboanga del Sur ang mosalmot sa Zamboanga Peninsula Exposition (ZAMPEX) 2026 nga ipahigayon gikan Oktubre 7 -11 sa KCC Mall de Zamboanga.
Matud ni Jason Jao ang Senior Trade Industry Development Specialists sa DTI Zamboanga del Sur, gikan sa 25 nga ihap, walo niini ang gikan sa Coconut Farmers and Industry Development Plan (CFIDP).
Pipila niini mao ang 3T Borces Food Products, Altoberos Food Products, Andon Bakery, Baclay Multi-Purpose Cooperative, C&S Cakes & Bakery Products, Cocos Nucifera, Agriculture Cooperative, D’Ouanos Food Products ug Green Meadow Organic Products.
Segun niya, ang mga partisipanteng MSMEs magdala ug magpakita sa ilang lokal nga mga produkto aron makapangita og bag-ong customer ug makabaton og business linkages ug posibleng partnerships.
Ang ZAMPEX 2026 nagdala sa tema nga “Evolve, Expand and Excel,” nga nagtutok sa pagpauswag sa produkto, pag-abot sa bag-ong merkado, ug pagpalig-on sa kompetisyon sa mga MSMEs.
Gawas sa pagbaligya sa produkto, mahimong venue usab ang exposition alang sa business matching ug pag-establisar og mas dugay nga merkado alang sa mga negosyante.
Giawhag usab ni Jao ang publiko nga bisitahon ang ZAMPEX 2026 ug suportahan ang mga lokal nga produkto ug MSMEs sa Zamboanga Peninsula.
