Gipangandam sa lokal nga kagamhanan sa Ormoc City ang pag-host sa Association of Tourism Officers in the Philippines (ATOP) National Convention 2026, pinaagi sa sunod-sunod nga koordinasyon sa mga hingtungdan nga opisina ug ahensya human nagpahigayon og tigom ang Technical Working Group (TWG) alang sa maong convention didto sa City Mayor’s Office Conference Room, niadtong, Setyembre 30, 2026.
Gipunting sa tigom ang mga importanteng pagpangandam alang sa tulo ka adlaw nga convention nga ipahigayon sa Ormoc City gikan Oktubre 20 hangtod 22, 2026.
Lakip sa mga gihisgutan ang logistics, programa sa kalihukan, seguridad ug mga protocol aron masiguro ang hapsay ug organisadong pagpahigayon sa maong nasudnong kalihukan.
Gikoordinar usab sa mga representante sa nagkalain-laing opisina sa lokal nga kagamhanan ug partner agencies ang ilang tagsa-tagsa ka buluhaton ug responsibilidad alang sa pagdawat sa mga delegado nga moabot gikan sa nagkalain-laing bahin sa nasod.
Mitambong sa maong tigom sila Supervising Tourism Operations Officer Nelson Alindogan, Executive-Legislative Liaison Dr. Gregorio Yrastorza III, City Engineer Loucelle Araneta, GSD Head Katherine Solaña, OIC-ENRO Ingrid Macabare, City Budget Officer Sabrina Duero, OIC-OCSO Rafael Muñoz, Tourism Staff Serg Ilarina, ingon man ang mga representante sa nagkalain-laing LGU offices, partner agencies ug enforcement agencies.
Pinaagi sa maong pagpangandam ug koordinasyon, gitumong sa mga hingtungdan nga masiguro ang hapsay nga pagpatuman sa programa ug ang kahapsay ug seguridad atol sa ATOP National Convention 2026.
Photo courtesy: City Government of Ormoc
