Patay ang usa ka 53-anyos nga tricycle driver human gipusil sa wala pa mailhing lalaki sa Barangay Salvacion, Murcia, Negros Occidental, sayo sa buntag niadtong Septiyembre 29, 2026. Ang biktima giila lamang sa alyas nga “Ernie,” ug residente sa maong barangay.
Sumala kang Police Captain Honey Labaro, hepe sa Murcia Municipal Police Station, nagmaneho sa iyang tricycle ang biktima sa dihang mihunong kini ug nanaog aron makig-istorya. Wala damha, adunay misakay og motorsiklo nga mihunong duol sa biktima. Nanaog ang usa ka lalaki gikan sa motorsiklo, miduol kang Ernie ug gipusil kini.
Nakaangkon og mga samad sa lawas ang biktima tungod sa pagpamusil ug daling gidala sa ospital. Apan wala na kini maluwas ug gideklarar nga dead on arrival sa doktor. Human sa pagpamusil, dali nga mikalagiw ang suspek sakay sa motorsiklo.
Samtang, miresponde ang kapulisan sa crime scene aron dokumentohan ug susihon ang mga posibleng ebidensya nga makatabang sa pag-ila sa suspek.
Padayon ang imbestigasyon sa Murcia Police aron mahibaloan ang motibo sa pagpamusil ug pagpatay, lakip na ang posibleng koneksyon sa biktima ug sa wala pa mailhing suspek.
