Gipailawom sa stress debriefing ug psychological first aid ang mga magtutudlo sa New Corella National High School sa probinsya sa Davao del Norte, human sa nahitabong online threat nga nakapahinabo og kabalaka sa mga estudyante, magtutudlo, ginikanan ug komunidad.
Gihatag ang psychosocial support pinaagi sa koordinasyon sa Municipal Health Office, Municipal Social Welfare and Development Office (MSWDO), Municipal Disaster Risk Reduction and Management Office (MDRRMO), ug DepEd New Corella District.
Tumong sa maong interbensyon nga matagad ang mental ug emotional well-being sa mga magtutudlo, mahatagan sila og luwas nga kahimtang aron mapadayag ang ilang mga kabalaka, ug mapalig-on ang ilang coping mechanisms human sa makahahadlok nga kasinatian. Pipila usab ka mga estudyante ang miapil sa maong interbensyon.
Samtang, gipahugtan sa New Corella Municipal Police Station ang seguridad sa mga eskwelahan isip lakang aron malikayan ang posibleng hulga ug masiguro ang kaluwasan sa mga magtutudlo ug estudyante.
Photo Courtesy: Bayan ng New Corella
