Naharang sa mga otoridad ang usa ka wing van truck nga nagkarga og gidudahang iligal nga mga mineral ores sa Pulawan Port, Dapitan City, kagahapon adlawa Septyembre 28, 2026. Ang operasyon gipahigayon sa hiniusang pwersa sa MGB, PCG, DENR-PENRO, Maritime Police ug OPENRO.
Ang maong wing van gipanag-iya sa “UCHO” nga adunay plakang AAV-4007 ug gimaneho ni Ramil Tolibas, 52 anyos, taga-Southern Leyte. Matup pa nakaplastar na kini sulod sa Lite Ferries 12 nga mobiyahe unta paingon sa Oslob, Cebu, apan gipagawas sa PCG human masuspetsahan ang kargamento.
Sa pag-inspeksyon, nasuta sa mga otoridad nga adunay iregularidad ang gipresentar nga Ore Transport Permit o OTP. Sumala sa MGB, walay OTP nga gi-isyu sa ilang regional office o bisan unsang sub-office alang sa maong kargamento, hinungdan nga gidudahang peke ang dokumento.
Sa dihang giablihan ang wing van, nasuta ang gibana-banang 505 ka sako nga gidudahang adunay high-grade mineral ores. Matud sa drayber, ang mga mineral ores gikan sa Siayan, Zamboanga del Norte ug ihatud unta ngadto sa Cebu City.
Gihatagan og Seizure Receipt ang maong kargamento isip kabahin sa legal nga proseso ug giselyohan ang wing van. Gidala kini sa Provincial Engineering Office alang sa temporaryong kustodiya sa OPENRO samtang nagpadayon ang imbestigasyon ug dugang nga pagsusi sa MGB.
Photo courtesy: Zanorte News Flash
