Nasikop sa kapulisan ang duha ka lalaki human misulay og sibat sa checkpoint ug nakuhaan og ginadiling droga sa Barangay Sinawal, General Santos City.
Bandang alas-7:15 sa buntag niadtong Domingo, nagpahigayon og routine checkpoint ang mga personahe sa Police Station 2 sa National Highway, DARBC area, Barangay Sinawal, dihang wala misunod ang duha ka suspek sa sugo sa kapulisan nga mohunong.
Hinuon, mipadagan pagpasibat ang mga sakay sa motorsiklo, apan gigukod sila sa kapulisan ug sa ulahi nasikop. Giila ang mga dinakpan sa alyas nga “Kuting,” 40 anyos, ug alyas “Aljon,” 21 anyos.
Sa pagkapkap sa ilang lawas, narekober ang duha ka sachet sa gituohang shabu nga motimbang og 3.8 gramos ug adunay gibanabanang street value nga P25,840.00.
Giatubang sa duha ka suspek ang kasong kalapasan sa Article 151 sa Revised Penal Code ug Republic Act 9165 o Comprehensive Dangerous Drugs Act, ug kasamtangang anaa na sa kustodiya sa kapulisan.
