Nakatala og lima ka kaso sa kamatayon tungod sa rabies ang rehiyon sa Northern Mindanao gikan niadtong Enero hangtod sa Agosto karong tuiga 2026, samtang onse ka mga kaso usab ang naitala sa tibuok tuig 2025.
Sumala pa ni Dr. Abel Santini G. Permites, usa ka RITM-DOH Certified Trainer on Rabies and Animal Bite Management, nga dili gihapon angay magkompyansa ang katawhan tungod kay hangtod sa kasamtangan, wala pa hingpit nga napakgang ang mga kaso sa pagkamatay tungod sa rabies subay sa mga nag-unang datos.
Gani, gipasiugda ni Dr. Permites nga labing mahinungdanon usab nga lantawon kung giunsa pagpatuman ang mga balaod sa paghipos sa mga laaw nga iro, lakip na ang lapad nga pagpabakuna sa mga kahayupan.
Dugang pa niya, kinahanglan ang hinanaling pagtagad ug saktong medikal nga pag-atiman human sa posibleng pagka-expose sa rabies gikan sa mga mananap sama sa iro nga sagad nagdala niini.
Agig pagsaulog sa World Rabies Day, ang Northern Mindanao Medical Center (NMMC) misalmot sa programa sa Kapihan sa PIA kaniadtong nakalabay nga adlaw aron hisgutan ang pagpugong sa rabies ug saktong pagdumala sa paak sa hayop.
Lakip sa gihisgutan sa kalihokan ang kamahinungdanon sa responsableng pag-atiman sa binuhi ug ang mga serbisyo sa panglawas alang sa publiko.
Photo courtesy: Provincial Veterinary Office -MisOr25
