Nagkahiusa ang mga fur parents ug ilang mga alagang iro sa unang Pet Run “Kalamboan Kontra Rabies” nga gipahigayon niadtong Setyembre 27 sa Capitol Grounds, Nabunturan, Davao de Oro.
Nagpartisipar sa 1.3-kilometer Pet Run ang nagkalain-laing breed sa mga iro, diin giapil usab ang mga kalihokan nga nagtumong sa pagpalambo sa responsableng pag-atiman sa mga alagang hayop.
Kabahin sa kalihokan ang Rabies Awareness Lecture gikan sa Provincial Health Office ug Provincial Veterinary Office, aron mapalambo ang kahibalo sa publiko bahin sa pagpugong ug paglikay sa rabies.
Samtang, mipahayag og kalipay si Key Melandres, usa sa mga fur parent nga miapil sa maong kalihokan, kay unang higayon nila nga nakaapil ang ilang mga pets sa Pet Run.
Gipasalamatan usab ni Melandres ang mga organizer, lakip si Governor Raul Mabanglo, ug ang mga sponsors tungod sa mga freebies sama sa vitamins, dog food ug treats nga nadawat sa mga partisipante.
Gihatagan usab og nagkalain-laing awards ang mga iro, samtang nakabenepisyo ang mga fur parents sa libreng anti-rabies vaccination, deworming, veterinary consultation ug grooming.
Pinaagi sa kalihokan, gipasidunggan dili lamang ang mga alagang hayop kondili gipasiugda usab ang responsableng pet ownership ug pagpanalipod sa komunidad batok sa rabies.
