Arestado ang upat ka indibidwal nga nagpalusot sa giingong mineral ores sa hiniusang pwersa sa kapulisan sa pagpanguna sa Sultan Naga Dimaporo atol sa checkpoint operation sa may alas 12 sa kadlawon niadtong Setyembre 27, 2026 sa Purok 3, Barangay Mamagum, Sultan Naga Dimaporo o SND, Lanao del Norte.
Giila ang driver nga si alyas “Ren,” 32 anyos, minyo ug residente sa Kidama, Matalam, Cotabato, uban ang tulo niyang kauban nga giila sa mga alyas nga “Kier,” 51, residente sa Kidapawan City; “Atan,” 27; ug “Gar,” 22, parehong residente sa Kidama, Matalam, Cotabato.
Subay sa report, nga atol sa operasyon gipahunong ang usa ka Sinotruk dump truck human namatikdan ang giingong improvised plate number, sa pagsuta nakit-an nga adunay paglapas sa LTO rules nga maoy hinungdan sa pag-impound sa sakyanan.
Sa dugang nga pagsusi, nadiskubrehan ang 125 ka sako sa giingong ore minerals nga gibana-banang mokabat sa 6.25 metric tonsug nga nagkantidad og ₱625,000.
Sa pagkakron, anaa pa sa kustodiya sa 2nd PMFC, LDN PPO ang dump truck ug mga giingong ore minerals, samtang gihulat ang megascopic analysis ug examination sa Mines and Geosciences Bureau Regional Office 10 aron matino ang klase sa mga nakumpiskang materyales ug ang angay nga sunod nga aksyon.
