Naghimo og validation ug pagpanubay sa mga panginahanglan ang DSWD Field Office 12, sa mga komunidad nga naapektuhan sa mga insidente sa armadong panagbangi ug tensiyon sa seguridad sa Nabalawag, SGA-BARMM, ug mga kasikbit nga komunidad sa Midsayap, Cotabato. Tumong sa maong kalihokan nga mahibal-an ang kahimtang sa mga residente nga napugos sa pagbakwit, lakip ang ilang mga nag-unang panginahanglan ug epekto sa ilang panginabuhi.
Kauban sa DSWD sa maong pagpanubay ang Municipal Disaster Risk Reduction and Management Office o MDRRMO, Municipal Social Welfare and Development Office o MSWDO, Provincial Social Welfare and Development Office o PSWDO, ug ACTED. Pinaagi sa hiniusang pag-verify sa kahimtang sa mga komunidad, gisusi ang kahimtang sa mga apektadong pamilya ug ang mga serbisyo ug tabang nga ilang gikinahanglan.
Pinaagi sa hiniusang pagsusi ug koordinasyon, mas mapalig-on ang pag-ila sa angay nga serbisyo alang sa mga apektadong pamilya. Padayon usab ang pagmonitor ug pakigtambayayong sa mga lokal nga pangagamhanan ug uban pang hingtungdan aron masiguro nga matubag ang nag-unang panginahanglan sa mga residenteng naapektuhan sa armadong panagbangi ug tensiyon sa seguridad.
Photo courtesy: DSWD Field Office 12
