Nanawagan ang mga mayor sa Davao de Oro sa mga ginikanan nga palig-onon ang pagbantay ug paggiya sa ilang mga anak, aron malikayan ang mga insidente bahin sa mga nahitabong pagpamusil sa sulod sa tulonghaan nga nahitabo pipila ka mga semana ang milabay.
Matud ni Compostela Mayor Levi Ebdao, dili lamang gobyerno ang adunay responsibilidad sa pagpanalipod sa mga bata, kundili apil usab ang matag pamilya. Gihangyo niya ang mga ginikanan nga bantayan ug imonitor ang ilang mga anak ug mas hatagan og pagtagad ang ilang mga kalihokan.
Samtang, gipahinungod ni Montevista Mayor Cyrex Basalo ang responsibilidad sa kaluwasan sa armas ngadto sa mga hamtong ug licensed firearm owners. Matud niya, kinahanglan sigurohon nga luwas ug husto ang pagkabutang sa mga armas aron dili kini maabot sa mga bata ug malikayan ang posibleng aksidente o kon insidente.
Gipahinumdom usab ni Mayor Ebdao ang mga ginikanan nga tarongon ang pagpadako sa ilang mga anak ug himuong lig-on nga pundasyon sa pamilya ang maayong paggiya ug pagtuo. Tumong sa maong pahimangno nga mapalig-on ang responsibilidad sa pamilya ug malikayan ang mga insidente nga mahimong makadaot sa mga bata ug sa komunidad
