Giimbestigahan sa Regional Anti-Cybercrime Unit (RACU) 11 Satellite Office sa Tagum City ang mikalat online nga posted sa Facebook nga adunay profiled name nga “Basta Delikado”, nga diin nakapaalarma sa mga netizens kung unsa ka tinuod ang maong insidente sa kagubot sa New Corella National High School, sa probinsya sa Davao del Norte.
Sumala sa impormasyon sa New Corella Municipal Police Station, nadawat sa kapulisan ang report alas-11:29 sa buntag, kagahapong adlawa, Setyembre 23, 2026 kalabutan sa gipagawas nga maka-alarma nga post sa nasangpit nga fb account.
Subay sa pagresponde sa mga kapulisan sa giingong tunghaan, nasaksihan nila ang nahitabong singgit sa mga estudyante tungod sa mikatap nga impormasyon.
Sa pagberipika sa kapulisan, nakumpirma nga dili tinuod nga adunay nahitabong pagpamusil diin ang maong hulga usa lamang ka misinformation gikan sa nasangpit nga account nga hinungdan sa kalisang ug kalibog online.
Nagpasidaan ang New Corella PNP sa katawhan nga likayan ang pagpakaylap sa mga dili beripikadong mga impormasyon ug kadudahang mga post, samtang padayon ang ginahimong lakang sa RACU 11 aron mailhan ang nagpaluyo ug nagpakatag sa sayop nga impormasyon tungod posible kining mag-atubang sa bug-at nga tulobagon sa balaod.
Photo Courtesy: PNP New Corella Municipal Police Station
