Nadakpan ang usa ka 31-anyos nga laborer atol sa hiniusang buy-bust operation sa Drug Enforcement Unit o DEU sa Esperanza Municipal Police Station ug Philippine Drug Enforcement Agency–Agusan del Sur Provincial Police Office o PDEA ADSPPO sa Purok 5, Barangay Cebulan, Esperanza, Agusan del Sur.
Gipangulohan ang operasyon sa DEU sa Esperanza MPS ubos sa pagpangulo ni PLT Rubi B. Calang, Officer-in-Charge. Ang nadakpan giila lamang sa alyas nga “Rey,” 31 anyos, laborer ug residente sa Purok 1, Barangay San Toribio, Esperanza, Agusan del Sur.
Nakumpiska gikan sa operasyon ang gibana-banang 0.8 gramos nga gituohang iligal nga droga, nga adunay estimated Dangerous Drugs Board value nga 5,440 pesos. Atubangon usab sa suspek ang kasong paglapas sa Sections 5 ug 11, Article II sa Republic Act No. 9165, o Comprehensive Dangerous Drugs Act of 2002.
Photo Courtesy: PNP Esperanza MPS
