Misaka ang kaso sa African Swine Fever (ASF) sa Dakbayan sa Sugbo, diin tulo ka barangay ang naapektuhan ug pito na ka baboy ang nangamatay sukad niadtong Domingo, Septiyembre 20.
Matud ni Chief of Staff Kenneth Siasar, base sa report sa Department of Veterinary Medicine and Fisheries (DVMF), kapin 50 ka baboy ang gilain ug gi-isolate gikan sa mga lugar sa Toong, Buhisan ug Pamutan. Aduna usab mga baboy nga gi-cull tungod sa suspetsang impeksiyon.
Gipalawig sa kagamhanan ang isolation sa mga apektadong lugar, samtang nagbantay ang Bureau of Fire Protection (BFP) aron dili makagawas o makasulod ang mga baboy isip kabahin sa containment measures.
Nakig-alayon ang kagamhanan sa Department of Engineering and Public Works (DEPW) alang sa mga pasilidad sa paglubong sa mga namatay nga baboy. Padayon usab ang DVMF sa pagsubay sa gigikanan sa virus ug pagpahugot sa biosecurity ug surveillance aron mapugngan ang dugang pagkaylap sa ASF.
Photo courtesy: Philippine News Agency
