Wala na kaikyas pa sa mga otoridad ang usa ka Top 8 Provincial Most Wanted Person human nadakpan atol sa gikasang operasyon didto sa Sitio Latay, Brgy. Limot, Tarragona, Davao Oriental pasado alas 9:30 niadtong nakalabay nga adlaw.
Gihimo ang operasyon sa mga personahe sa Mati City Police Station, kauban ang mga operatiba sa PIU DOPPO, CIDG Davao Oriental PFU ug lain pang mga law enforcement units nga miresulta sa pagkasikop ni alyas “Taba”, 48 anyos, ulitawo, mag-uuma, ug residente sa Purok 8, Brgy. Mayo, Mati City sa maong probinsya.
Naaresto ang suspek pinaagi sa pagpatuman sa warrant of arrest alang sa kasong Frustrated Homicide ug Attempted Homicide ilalom sa Criminal Case No. 106906-26 ug 15171-8-26 nga adunay girekomendang piyansa nga mukabat sa Php 72,000.00 ug Php 36,000.00.
Ang maong warrant giisyu sa duha ka Presiding Judge, RTC, Eleventh Judicial Region, Branch 5, penitsahan niadtong Setyembre 11 ug Agosto 28, 2026. Sa pagkakaron ang dinakpan anaa na sa kustodiya sa Mati City Police Station alang sa dokumentasyon ug tukmang disposisyon.
Photo Courtesy: Mati CPS
