Gilunsad sa Social Security System o SSS Pagadian ang SSS E-Wheels, usa ka inisyatiba nga nagtumong sa pagdala sa serbisyo sa SSS mas duol sa mga miyembro sa nagkadaiyang munisipalidad sa Zamboanga del Sur.
Matud ni SSS Pagadian Branch Manager Edwin Remoto, pipila na ka mga munisipalidad ang ilang naadtuan pinaagi sa SSS E-Wheels, diin direktang gidala sa mga lugar ang mga serbisyo sa SSS aron mas dali kining ma-access sa mga miyembro ug sa mga gustong mahimong miyembro.
Pinaagi niini, mas mapadali ang pagkuha og impormasyon ug pagproseso sa mga transaksyon may kalabutan sa membership, kontribusyon, benepisyo ug uban pang serbisyo sa SSS. Dugang pa ni Remoto, ilang gipalig-on ang internet connectivity matag pag-adto sa mga lugar aron mas daghang miyembro ang ilang ma-accommodate.
Gilauman sa SSS Pagadian nga pinaagi sa SSS E-Wheels, mas daghang miyembro sa probinsya ang maabot ug mas mapalapad ang access sa serbisyo sa ahensya.
