Gipasiugda sa Integrated Provincial Health Office (IPHO) Zamboanga del Sur ang importansya sa pagpabakuna sa mga bata batok sa Hepatitis B. Una nga gihatagan og gibug-aton ang unang dose sa bakuna nga kinahanglan mahatag sulod sa unang 24 oras human matawo ang bata.
Sumala ni Dahlia Aseniero, Health Promotion Officer sa IPHO, mandatory ang Hepatitis B vaccination alang sa mga bag-ong natawo tungod kay mas taas ang risgo nga mahimong chronic ang impeksyon kung matakdan sa sayong edad. Dugang pa niya, ang mga hamtong nga gustong magpabakuna batok Hepatitis B kinahanglan una nga moagi og laboratory test.
Gidasig usab niya ang mga ginikanan nga kompletohon ang bakuna sa ilang mga anak, subay sa girekomendar nga immunization schedule sa Department of Health, aron malikayan ang Hepatitis.
