Nadakpan sa Regional Maritime Unit 13 o RMU13 ang 16 ka indibidwal, atol sa seaborne operation batok sa ilegal nga pagpangisda sa kadagatan sa Barangay Day-asan, ning dakbayan sa Surigao. Gipahigayon ang operasyon sa makalabayng adlaw, diin nasakpan ang mga suspek nga aktuwal nga nangisda gamit ang improvised diving equipment ug air compressor nga walay saktong mga dokumento.
Nakumpiska usab sa mga operatiba isip ebidensya ang mga dimakinang sakayan, mga gamit sa pagpangisda, ug mga isda nga nakuha atol sa operasyon. Padayon ang imbestigasyon ug tukmang proseso batok sa mga nadakpan, samtang gipalig-on sa RMU13 ang pagpatuman sa mga balaod alang sa pagpanalipod sa kadagatan.
Gipasiugda sa kapulisan ang kamahinungdanon sa pagsunod sa mga regulasyon sa pagpangisda aron mapanalipdan ang marine resources ug mapadayon ang luwas, hapsay ug responsableng pagpangisda sa kadagatan sa Surigao City.
Photo Courtesy: Regional Maritime Unit 13
