Mas nagkadaghan ang mga Pilipino nga overweight ug obese, apil na ang mga bata. Base sa 2025 Updating Survey sa DOST-FNRI, 16 porsyento sa mga batang edad 5 hangtod 10 anyos ang overweight o obese. Misaka kini gikan sa mga 5 porsyento niadtong 2003.
Sumala ni Health Undersecretary ug National Nutrition Council Executive Director Albert Domingo, nagsugod sa panimalay ang mga batasan sa pagkaon, lakip ang kanunay nga pagkonsumo og tam-is nga pagkaon ug ilimnon.
Samtang sa mga hamtong nga edad 20 hangtod 59 anyos, misaka usab sa 43.1 porsyento ang overweight ug obese niadtong 2025, gikan sa 16.6 porsyento niadtong 1993.
Tungod niini, gisugyot sa mga magbabalaod ang pagpataas sa excise tax sa mga sweetened beverages aron mapugngan ang sobra nga pagkonsumo niini.
Gisuportahan sa Department of Health ug Department of Finance ang maong lakang, lakip ang posibilidad nga maapil sa buhis ang 3-in-1 coffee ug ubang matam-is nga produkto.
Photo Courtesy: GCC Business News
