Pormal nang gipang-apod-apod sa Department of Agrarian Reform kun DAR Davao Oriental ang 12.87 ka ektarya nga yuta ngadto sa napulo ka Agrarian Reform Beneficiaries kun ARBs gikan sa Barangay Sainz, Mati City, ug sa Barangay Maputi, Banaybanay.
Gipanghatag ang maong mga yuta isip kabahin sa kalihokang “Handog ng Pangulo” nga gipahigayon niadtong Septyembre 14, 2026 didto sa Provincial Capitol Covered Court ning dakbayan.
Ang maong kalihokan gitambongan sa 665 ka mga partisipante gikan sa nagkalain-laing ahensya sa gobyerno. Kabahin sa maong programa ang pagpanghatag sa Certificates of Land Ownership Award kun CLOA ngadto sa mga kwalipikadong benepisyaryo. Gawas sa land distribution, naghatag usab ang DAR og libreng serbisyo pinaagi sa DAR Legal Consult Express ug Agrarian Reform Support Hub, diin gihatagan og konsultasyon ug tabang ang mga benepisyaryo ug uban pang nanginahanglan og serbisyo sa ahensya.
Gipahigayon usab ang “ARBidang Produkto,” diin gipakita ug gibaligya direkta ngadto sa publiko ang nagkalain-laing produkto sama sa mga utanon, prutas, ug uban pang produkto nga gihimo ug gipadako sa mga mag-uuma nga benepisyaryo sa agrarian reform.
Photo Courtesy: DAR DavOr
