Gitangtang na sa Bureau of Internal Revenue (BIR) ang value-added tax (VAT) sa allowable system loss charge nga makita sa bayranan sa kuryente.
Sa Revenue Memorandum Circular (RMC) 97-2026 nga gipagawas niadtong Lunes, pormal nga giila sa BIR ang allowable system loss charge sulod sa limit nga giaprobahan sa ERC isip gikinahanglang bayranan nga gipasa sa gobyerno, ug dili na kini iapil sa gross sales nga pahamtangan ug VAT.
Pasabot niini, dili na pabayron og VAT ang gitugot nga system loss charge, busa maminusan ang kantidad sa bayranan sa kuryente nga ipasa ngadto sa member consumer owners (MCOs).
Matud ni BIR Commissioner Charlito Martin Mendoza, usa kini sa mga lakang nga mahimo sa gobyerno aron maminusan ang gasto sa kuryente ubos sa kasamtangang balaod.
Padayon usab ang Kongreso sa paghisgot sa mas halapad nga mga kausaban sa electricity taxes ug charges sa kuryente, diin giingon sa BIR nga ilang gihimo ang tanang lakang aron mapagaan ang bayranan sa mga konsumante.
