Misaka na sa 76 ang kumpirmadong ihap sa mga namatay sa sunog nga miigo sa MV June Aster sa Coron, Palawan, sumala sa pinakabag-ong report sa Philippine Coast Guard o PCG. Dugang nga 41 ka patay ang natala, samtang 13 pa ang padayong gipangita sa mga awtoridad.
Nagpabiling 43 ang ihap sa mga naluwas sa maong insidente. Sumala kang PCG Spokesperson Noemie Cayabyab, dad-on ang mga narekober nga patayng lawas ngadto sa BRP Cape Engaño alang sa hustong proseso sa recovery ug identification.
Base sa opisyal nga passenger manifest, mokabat sa 134 ka mga tawo ang nalista nga misakay sa MV June Aster, samtang duha ang gituohang wala makasakay sa maong barko. Gikumpirma usab sa PNP-SOCO nga apil sa mga narekober nga patayng lawas ang usa ka binuhing iro.
Matud sa PCG ug uban pang mga ahensya, posible pa mausab ang ihap sa mga namatay ug missing samtang nagpadayon ang operasyon sa pag-recover ug pag-ila sa mga narekober nga patayng lawas. Padayon usab ang koordinasyon sa mga awtoridad alang sa hustong pagproseso sa mga biktima ug paghatag og tabang sa mga naluwas.
Photo Courtesy: The Economic Times
