Mikabat na sa 283 ka loose firearms ang nasakmit sa nagkadaiyang operasyon sa kapulisan ubos sa Police Regional Office 13 (PRO-13), isip kabahin sa kampanyang “Oplan Katok” ug uban pang mga operasyon gikan sa bulan sa Oktobre.
Nanguna ang Agusan del Sur sa tanang probinsya sa Caraga Region human makarekober og 62 ka loose firearms. Misunod niini ang Surigao del Sur nga adunay 56 ka nakumpiskang armas, samtang 47 ang narekober sa Agusan del Norte.
Gipresentar sa PRO-13 ang kinatibuk-ang 283 ka nakuhang armas atol sa usa ka kalihokan nga gipahigayon sa Butuan City niadtong Nobyembre 4, 2026.
Gipangulohan ni Police Brigadier General Rolindo M. Suguilon ang maong presentasyon, nga nagpakita sa resulta sa kampanya sa kapulisan batok sa pagpanag-iya ug pagkupot sa mga armas nga walay legal nga dokumento.
Nagpadayon ang PRO-13 sa pagpalig-on sa kampanyang Oplan Katok aron makuha ang mga loose firearms ug mapalambo ang kalinaw ug seguridad sa tibuok rehiyon.
