Nasikop sa mga otoridad ang usa ka giingong pekeng dentista atol sa gipahigayong entrapment operation sa Purok 3, Barangay San Isidro, lungsod sa Santiago, Agusan del Norte, sa makalabayng adlaw. Giila ang dinakpan nga si alyas “Lang-Lang,” 36-anyos, ug residente sa maong lugar.
Atol sa operasyon, nakumpiska gikan sa posisyon sa suspek ang duha ka dental laboratory motors, 14 ka lower dental impression trays, 272 ka artificial teeth ug uban pang mga gamit nga may kalabotan sa dental services.
Gipangunahan ang operasyon sa mga personahe sa Regional Intelligence Division 13, kauban ang Santiago Municipal Police Station. Mag-atubang karon og kasong paglapas sa Section 33, Article V sa Republic Act 9484 o Philippine Dental Act of 2007 ang dinakpan.
Ang maong balaod naglatid sa mga regulasyon sa pagpraktis sa propesyon sa dentistry sa nasud, lakip ang pagdili sa mga tawo nga walay angay nga lisensya sa pagpraktis isip dentista.
Gipahinumdoman usab ang publiko nga importante ang pagsiguro sa kwalipikasyon ug lisensya sa mga dental practitioner aron malikayan ang posibleng peligro sa panglawas.
