Gitinguha sa National Meat Inspection Service (NMIS) Region 9 nga magpatuman og training kada tuig alang sa mga interesadong mahimong meat inspector sa nagkadaiyang bahin sa Zamboanga Peninsula Region.
Matud ni NMIS-9 Regional Technical Director Dr. Rudio Abulencia, dako ang kaakuhan sa mga meat inspector sa dili pa ihawon ang hayop hinungdan kada tuig sila naglusad ug training para sa mga local meat inspector sa tibuok region 9 para daghan ang muhimo sa inspeksyon.
Segun ni Dr. Abulencia, nagtinabangay na ang mga Local Government Units ug ang NMIS-9 alang sa paglusad sa libreng training para sa mga mamahimong Meat Inspectors.
Pinaagi niini, gilauman nga mas daghang personnel gikan sa mga lokal nga panggamhanan ang makabaton og hustong pagbansay ug kahibalo sa meat inspection, ilabi na sa pag-ila sa mga hayop nga angay ug dili angay ihawon.
Dugang pagpasabot ni Dr. Abulencia, tumong sa maong programa nga mapalig-on ang sistema sa inspeksyon sa karne sa tibuok Zamboanga Peninsula aron masiguro ang kaluwasan sa mga konsumante.
