Sikop ang usa ka 30-anyos nga lalaki sa kapulisan sa gihimong buy-bust operation sa Purok 11, Barangay Poblacion, Mawab, Davao de Oro, pasado alas 9:20 sa gabii niadtong Nobyembre 7, 2026.
Gibanabanang usa ka gramo sa gituohang shabu ang nakuha gikan sa operasyon, lakip ang ubang mga ebidensiya nga giingong may kalabotan sa ilegal nga transaksiyon sa droga.
Ang operasyon gipahigayon sa Mawab Municipal Police Station (MPS), kauban ang Provincial Drug Enforcement Unit (PDEU), ubos sa superbisyon ni PCPT Elbest S. Taping ug koordinasyon sa PDEA XI Pre-Operations.
Matod ni PMAJ June Eric B. Deguito, hepe sa Mawab MPS, magpadayon ang ilang mga operasyon batok sa ilegal nga droga aron mapanalipdan ang mga pamilya ug kabatan-onan batok sa makadaot nga epekto niini.
Giawhag usab sa kapulisan ang publiko nga makigtambayayong ug motaho sa bisan unsang kahina-hinalang kalihokan aron matabangan ang pagmintinar sa kalinaw ug seguridad sa lungsod.
