Naglunsad ang lokal nga kagamhanan sa Ormoc og Eco-Restoration Drive ug Resilience Forum sa Mangrove Eco Park niadtong Nobyembre 5, 2026, isip kabahin sa paghinumdom sa ika-35 nga anibersaryo sa makasaysayang pagbaha sa dakbayan niadtong 1991.
Gipahigayon ang maong kalihokan isip pagpasidungog sa mga kinabuhi nga nawala sa maong trahedya, lakip ang pagpasiugda sa kahinungdanon sa pagpanalipod sa kalikupan ug pagpalig-on sa kahandam sa komunidad batok sa mga kalamidad.
Kabahin sa programa ang pagpanglimpyo sa kabaybayonan ug pagpangtanom og mga bakhaw aron makatampo sa pagpanalipod ug pagpahiuli sa mga dapit nga duol sa baybayon. Gipaambit usab sa mga naluwas sa trahedya ang ilang mga kasinatian atol sa Resilience Forum.
Gipahigayon usab ang usa ka panag-ampo nga ekumenikal nga gipangulohan ni Brother Nathanial Baluyo, Servant Leader sa Order of St. Francis of Assisi.
Mitambong sa kalihokan si SP Member Lalaine Marcos, Chairperson sa Committee on Environment, Natural Resources and Energy Conservation, kauban ang mga kawani sa lokal nga kagamhanan, mga boluntaryo gikan sa nagkalainlaing opisina sa gobyerno ug mga representante sa mga ahensiya nga nagpatuman sa balaod.
Samtang, gitakdang ipahigayon karong Nobyembre 6, 2026, sa Ormoc City Hall ang Balaang Misa alang sa mga biktima sa 1991 Ormoc City Flash Flood.
Photo courtesy: City Government of Ormoc
