Gitin-aw ni Surigao del Norte Governor Robert Lyndon S. Barbers nga walay kamatuoran ang nagkatag nga mga pahayag sa social media nga nag-attribute kaniya sa pulong nga, “Kung dili kamo mosunod, pahawa kamo sa Siargao,” kalabot sa permanenteng pagsira sa Malinao Skate Road.
Sa iyang gipagawas nga pahayag, giklaro sa gobernador nga wala gayud siya mosulti sa maong mga pulong ug iyang gihulagway kini nga hinimo-himo nga pahayag nga nagtinguha sa paghatag og sayop nga impresyon ngadto sa publiko.
Gipasabot ni Barbers nga dili responsibilidad o awtoridad sa Provincial Government of Surigao del Norte ug sa Municipal Government of General Luna ang pagdesisyon sa pagsira sa maong kalsada, tungod kay ana-a kini sa hurisdiksyon sa Department of Public Works and Highways o DPWH.
Matud pa sa gobernador, ang DPWH, pinaagi ni Engineer Elvis G. Calunod, maoy nagsang-at og pormal nga reklamo sa Office of the Ombudsman in Mindanao nga adunay docket number OMB-M-C-OCT-26-0247 batok kang Barangay Captain Arnulfo S. Alcala ug pito ka barangay kagawad.
Ang maong reklamo may kalabotan sa giingong kapakyasan sa barangay nga ipatuman ang mga restriksyon ug mga pahimangno sa DPWH batok sa paggamit sa nasudnong kalsada alang sa mga kalihokan nga wala gitugoti, bisan pa sa mga reklamo sa mga residente sulod sa daghang bulan.
Nunot pa niini, gipadayag ni Barbers nga iyang giila ang dakong kontribusyon sa skateboarding sa identidad ug turismo sa tibuok probinsya, ilabina sa paghatag og oportunidad sa mga kabatan-onan.
Gipahayag usab niini nga andam siyang makigtambayayong sa LGU General Luna aron makapangita og luwas ug angay nga lugar alang sa mga skateboarders, nga dili makompromiso ang kaluwasan sa publiko.
Sa kataposan, mihangyo ang gobernador sa mga Surigaonon nga ipadayag ang kamatuoran gikan sa mga hinimo-himong istorya ug magtinabangay alang sa kaayohan sa tibuok probinsya.
