Nagpahimangno ang Lake Sebu Municipal Police Station sa South Cotabato batok voice phishing o “vishing,” usa ka pamaagi sa scam diin ang mga kawatan mogamit og tawag sa telepono aron limbongan ang biktima ug makuha ang sensitibong impormasyon sama sa password, bank account number ug credit card details.
Matud sa kapulisan, kasagarang magpakaaron-ingnon ang mga scammer nga representante sa bangko, ahensya sa gobyerno o iladong kompanya. Mahimo usab nilang gamiton ang personal nga impormasyon nga ilang nakolekta aron mas makapaniid ug makapadani sa ilang biktima.
Gipahinumdoman ang publiko nga dili ihatag o kumpirmahon pinaagi sa telepono ang personal ug pinansyal nga impormasyon, ilabina kung gikan sa wala mailhing numero. Kung adunay kadudahang tawag, hangyoon ang caller sa iyang kompletong pangalan ug opisyal nga hotline, dayon ibutang ang tawag ug beripikaha mismo ang impormasyon. Mahimo usab nga i-activate ang spam call filtering ug blocking features sa cellphone. Alang sa tabang, mahimong mokontak sa Lake Sebu Municipal Police Station sa 0917-508-6874 o motawag sa 911.
Photo Courtesy: PNP Lake Sebu Municipal Police Station
