Gipasidunggan sa Philippine Normal University (PNU) si “People’s Champ” Manny Pacquiao og Doctor in Physical Education (PE) and Sports, Honoris Causa, isip pag-ila sa iyang dakong kontribusyon sa Philippine sports.
Sumala sa opisyal nga anunsyo sa PNU sa ilang social media page niadtong nakalabay nga adlaw dili lamang ang mga kadaugan ni Pacquiao sa boxing ang basehan sa maong pag-ila, kundili apil usab ang inspirasyon nga iyang gihatag sa mga Pilipino pinaagi sa iyang panaw gikan sa kalisod paingon sa pagka-usa sa labing iladong atleta sa nasud.
Gipasiugda sa PNU, nga giila isip National Center for Excellence in Teacher Education, nga mas labaw pa sa mga world championship belt ang kabilin ni Pacquiao sa sports.
Sumala sa unibersidad, ang iyang kinabuhi nagpakita nga ang kalampusan mahimong magsugod bisan sa yano ug lisod nga kahimtang, ug dili kinahanglan mahimong babag ang kakabus o kahimtang sa kinabuhi aron maabot ang mga pangandoy.
Usa sa pinakadakong nahimo ni Pacquiao sa boxing mao ang pagkahimong una ug hangtod karon isip bugtong eight-division world champion sa kasaysayan sa boksing.
Nagsilbi usab siyang inspirasyon sa ubang mga atletang Pilipino sama nila Olympic gold medalists Hidilyn Diaz ug Carlos Yulo, ingon man sa pole vaulter nga si EJ Obiena, nga mipadayon sa paghatag og dungog sa nasud sa international competitions.
Ang Honoris Causa usa ka honorary degree o espesyal nga akademikong pagpasidungog nga gihatag sa usa ka unibersidad ngadto sa usa ka indibidwal, isip pag-ila sa iyang talagsaong kontribusyon sa katilingban, sports, arts, siyensya o serbisyo publiko, bisan wala siya moagi sa regular nga academic requirements alang sa maong degree.
Photo Courtesy:Instagram
