Gibida sa Department of Agriculture-Davao Region o DA-11 ang mga lokal nga prutas ug uban pang produkto sa agrikultura sa Manila Foods and Beverages Expo o MAFBEX Cebu 2026 nga gipahigayon sa IEC Convention Center sa Cebu City gikan Setyembre 10 hangtod 13, 2026.
Pinaagi sa Agribusiness and Marketing Assistance Division o AMAD, gipakita sa DA-Davao ang nagkalain-laing prutas nga anihon sa Davao Region, nga gitumong aron maila ug mapalapad ang merkado sa mga produkto ngadto sa mga konsumidor, mamalitay ug ubang potensyal nga kliyente gawas sa rehiyon.
Sumala sa DA-Davao, ang pag-apil sa maong kalihukan makatabang sa pagpalig-on sa koneksyon sa mga mag-uuma, prodyuser ug mga negosyo sa agrikultura ngadto sa mas dagkong merkado.
Samtang gilauman usab nga pinaagi niini, mas daghang oportunidad sa pagbaligya ug pagpalambo sa lokal nga mga produkto ang maablihan alang sa mga mag-uuma ug negosyante sa Davao Region.
Photo Courtesy: Agri Info Davao
