Patay nga nakaplagan ang usa ka 50-anyos nga lalaki sa iyang pinuy-anan alas 8:35 sa buntag karong adlawa Setyembre 11, 2026 sa Barangay San Miguel, Tagum City, Davao del Norte. Giila sa kapulisan ang biktima nga si alyas “Dennis,” residente sa maong lugar ug naglingkod sa salog sa terrace duol sa main door sa iyang balay.
Subay sa report sa Tagum City Police Station, nakadawat sila og impormasyon pinaagi sa BISMUTH Radio Base bahin sa insidente, hinungdan nga daling mitubag sa lugar ang mga personnel sa Mobile Patrol 01 uban ang mga duty investigator alang sa ocular inspection ug imbestigasyon.
Base sa impormasyon gikan sa igsoon sa biktima nga giilang si alyas “Recson”, bandang alas 7:50 sa buntag sa maong adlaw, miadto siya sa balay sa iyang igsuon diin asa nasaksihan niini ang motorsiklo nga natumba duol sa iyang panimalay.
Misulod gilayon si “Recson” sa balay ug nakita ang iyang igsuon nga naglingkod sa salog sa terrace duol sa main door ug wala nay kinabuhi. Human niini dali siyang nangayo og tabang sa mga otoridad, diin mitubag ang CDRRMO Rescue Team.
Apan wala na gidala sa ospital ang lalaki tungod aduna na kini klarong timailhan sa kamatayon. Giproseso usab sa Davao Norte Provincial Forensic Unit o DNPFU ang crime scene ug nagpahigayon og examination ug base sa inisyal nga assessment, wala’y nakitang klarong timailhan sa foul play.
Subling gipahinumdoman sa Tagum City Police Station ang publiko nga ang opisyal nga impormasyon bahin sa insidente kinahanglan lamang kuhaon gikan sa mga otoridad aron malikayan ang pagpakaylap sa mga impormasyon wala pa’y klarong basehan.
Photo Courtesy: Tagum PNP
