Misupak ang youth sector sa National Anti-Poverty Commission (NAPC) sa plano nga palawigon ngadto sa lima ka tuig ang termino sa mga opisyal sa Sangguniang Kabataan (SK), nga karon gihisgutan na sa Senado human nga makalusot sa ubos balay balauranan.
Matud ni Khyle Sabellano, council member sa NAPC nga nagrepresentar sa youth sector, dili kinahanglan ang lakang tungod kay igo na ang upat ka tuig nga termino aron mapakita sa mga opisyal sa SK ang ilang kapasidad sa pagdumala.
Gipunting usab ni Sabellano nga mas daghan pang reporma ang angay ipatuman sa SK aron malikayan nga mahimong breeding ground kini sa mga korap nga opisyal sa gobyerno sa umaabot. Dako usab, matud niya, ang papel sa SK sa pagduso ug pagsiguro sa kaayuhan sa mga kabataan sa matag barangay.
Busa, iyang gihatagan og gibug-aton ang panginahanglan nga mahatagan og hustong giya ug suporta ang mga batan-ong lider aron mahimong epektibo ug responsable sila sa ilang pag-alagad sa komunidad.
Photo courtesy: Wiki
